କାଶୀପୁର ବ୍ଲକ ସିଜିମାଳି ପାହାଡ଼ ଅଂଚଳରେ ବିଶ୍ୱ ଆଦିବାସୀ ଦିବସ ପାଳନ କରିଥିଲେ ଅଂଚଳବାସୀ । ଏଥିରେ ଶାଗବାରି, କଂଟାମାଳ, ସୁଙ୍ଗେର, ଅଦାଜୋର ସମେତ କଳାହାଣ୍ଡି ଜିଲାର ଥୁଆମୂଳ-ରାମପୁର ଅଂଚଳର ହଜାର ସଂଖ୍ୟାରେ ଆଦିବାସୀ ଯୋଗଦେଇଥିଲେ । ଏଥିରେ ପୂର୍ବତନ ମନ୍ତ୍ରୀ ଜୟରାମ ପାଙ୍ଗି, ପୂର୍ବତନ ବିଧାୟକ ବିଭିଷଣ ମାଝି ଓ ସଂଗ୍ରାମୀ ନେତା ଉପେନ୍ଦ୍ର ମାଝି ଅତିଥି ଭାବେ ଯୋଗଦେଇଥିଲେ । ଆଦିବାସୀମାନେ ପାରମ୍ପରିକ ଅସ୍ତ୍ରୋଶସ୍ତ୍ର ଧରି ରୀତିନୀତିରେ ପୂଜାର୍ଚ୍ଚନା କରି ବିଶ୍ୱ ଆଦିବାସୀ ଦିବସ ପାଳନ କରିଥିଲେ । ଏହି ସମୟରେ ଅଂଚଳରେ ପ୍ରବଳ ବର୍ଷା ହୋଇଥିଲେ ମଧ୍ୟ ସେମାନଙ୍କ ମନୋବଳ ଭାଙ୍ଗିନଥିଲା । ଏଥିରେ ଯୋଗଦାନ କରିଥିବା ମା ମାଟି ମାଳି ସୁରକ୍ଷା ମଂଚର ମାର୍ଗଦର୍ଶକ ଲିଙ୍ଗରାଜ ଆଜାଦ, ଲକ୍ଷ୍ମଣ ମାଝି, ଦୁର୍ଯ୍ୟୋଧନ ନାଏକ, ପାର୍ବତୀ ମାଝିଙ୍କ ସମେତ ସେଠାରେ ଉପସ୍ଥିତ ସିଜିମାଳି ପାହାଡ଼ ଅଂଚଳବାସୀ ସିଜିମାଳି ଖଣି ଖନନକୁ ଦୃଢ଼ ବିରୋଧ ପ୍ରକାଶ କରି ବେଦାନ୍ତ ଓ ମୈତ୍ରୀ କମ୍ପାନୀ ଉପରେ ବର୍ଷି ଛନ୍ତି । ଏଥି ସହିତ ଅଂଚଳରେ ଖଣି ଖନନ ହେଲେ ଏଠାକାର ନିରୀହ ଆଦିବାସୀଙ୍କ ଜୀବିକା ନିର୍ବାହ ପନ୍ଥା ସମ୍ପୂର୍ଣ୍ଣ ଲୋପ ପାଇଯିବ ଏବଂ ନିକଟସ୍ଥ ବସବାସ କରୁଥିବା ହଜାର ହଜାର ଆଦିବାସୀ ପରିବାର ଅସହାୟ ହୋଇଯିବ ବୋଲି କହିଛନ୍ତି ।
ସେମାନେ କହିଛନ୍ତି ଯେ, ଏଠାରେ ପିଢ଼ି ପରେ ପିଢ଼ି ବସବାସ କରିଆସୁଛନ୍ତି । ଏଠାରେ ବହୁ ଚିରସ୍ରୋତା ଝରଣା, ବିଭିନ୍ନ ପ୍ରକାର ଔଷଧୀୟ ବୃକ୍ଷଲତା ରହିଛି ଯାହା ଖଣି ଖନନ ହେଲେ ସମ୍ପୂର୍ଣ୍ଣ ନଷ୍ଟ ହୋଇଯିବ । ଏତଦବ୍ୟତିତ ଜଙ୍ଗଲଜାତ ବିଭିନ୍ନ ଦ୍ରବ୍ୟ ସହିତ ସପୁରୀ ଓ ମକା ଆଦି ଚାଷ କରି ପରିବାର ଭରଣପୋଷଣ ମଧ୍ୟ ଚାଲିଯିବା ସହିତ ପରିବେଶ ସମ୍ପୂର୍ଣ୍ଣ ଦୂଷିତ ହୋଇଯିବ ବୋଲି ଅଂଚଳବାସୀ କହିଛନ୍ତି । ଏହି କାର୍ଯ୍ୟକ୍ରମରେ ଯୋଗଦାନ କରିଥିବା ଅତିଥିବୃନ୍ଦ ତଥା ରାଜନେତାମାନେ ମଧ୍ୟ ଖଣି ଖନନକୁ ବିରୋଧ କରିଛନ୍ତି । ଏହି କାର୍ଯ୍ୟକ୍ରମରେ ଜିଲାପାଳ ଓ ପୋଲିସ ପ୍ରଶାସନ ସେମାନଙ୍କ ପାରମ୍ପରିକ ଆଦିବାସୀ ଦିବସ ପାଳନରେ ବାଧା ସୃଷ୍ଟି ପୂର୍ବକ ସେମାନଙ୍କ ଅତିଥି ତଥା ବିଶିଷ୍ଟ ପରିବେଶବିତ୍ ମେଧା ପାଟେକର, ପ୍ରଫୁଲ ସାମନ୍ତରାୟ, ନରେନ୍ଦ୍ର ମହାନ୍ତି, ନିୟମଗିରି ସୁରକ୍ଷା ସମିତି, ମା ମାଟି ମାଳି ସୁରକ୍ଷା ମଂଚ ଭଳି ସଂଗଠନଙ୍କ ପାଇଁ ଉକ୍ତ ଅଂଚଳ ନିଷେଧାଂଚଳ କରିବା ସମେତ କାର୍ଯ୍ୟକ୍ରମସ୍ଥଳକୁ ଅଂଚଳବାସୀଙ୍କ ପ୍ରବେଶ ନିଷେଧାଦେଶକୁ ମଧ୍ୟ ନିନ୍ଦା କରିଛନ୍ତି । ତେଣୁ ରାଜ୍ୟ ସରକାର ଓ କେନ୍ଦ୍ର ସରକାର ଏଥିପ୍ରତି ଦୃଷ୍ଟି ଦେଇ ସେମାନଙ୍କ ପ୍ରତି ନ୍ୟାୟ କରିବାକୁ ଅଂଚଳବାସୀ ଦାବି କରିଛନ୍ତି।ରାୟଗଡ଼ାରୁ ସନ୍ତୋଷ ସାହୁଙ୍କ ରିପୋଟ।
