କେନ୍ଦ୍ରାପଡ଼ା ଜିଲ୍ଲାରେ ବାଲେଶ୍ୱର ଜିଲ୍ଲାର ସୌମ୍ୟାଶ୍ରୀ ଘଟଣାର ପୁନରାବୃତ୍ତି ଘଟିଛି । ଯୌନ ନିର୍ଯ୍ୟାତନାର ଶିକାର ହୋଇ ସୌମ୍ୟାଶ୍ରୀ ଯେଭଳି ନିଜ ଦେହରେ କିରୋସିନ ଢାଳି ଆତ୍ମହତ୍ୟା କରିଥିଲେ ଠିକ ସେହିପରି କେନ୍ଦ୍ରାପଡ଼ା ଜିଲ୍ଲାରେ ଜଣେ ଯୁକ୍ତ ତିନି ଶେଷ ବର୍ଷର ଛାତ୍ରୀ ନିଜ ଦେହରେ କିରୋସିନ ଢାଳି ଆତ୍ମହତ୍ୟା କରିଛନ୍ତି । କେନ୍ଦ୍ରାପଡ଼ା ଜିଲ୍ଲାର ପଟ୍ଟାମୁଣ୍ଡାଇ ଗ୍ରାମାଞ୍ଚଳ ଥାନା ଅନ୍ତର୍ଗତ ବଡ଼ପଡା ଗ୍ରାମରେ ଜଣେ କଲେଜ ଛାତ୍ରୀ ପୁରୁଷ ବନ୍ଧୁଙ୍କ ଦ୍ୱାରା ବ୍ଲାକ ମେଲିଙ୍ଗର ଶିକାର ହୋଇ ନିଜ ଦେହରେ କିରୋସିନ ଢାଳି ଆତ୍ମହତ୍ୟା କରିଛନ୍ତି । ତାଙ୍କ ପୁରୁଷ ବନ୍ଧୁ ତାଙ୍କର ଦୁର୍ବଳ ମୁହୂର୍ତ୍ତର ଫଟୋ ଓ ଭିଡିଓ ରଖି ସାମାଜିକ ଗଣମାଧ୍ୟମରେ ଭାଇରାଲ କରିଥିଲେ ।
ନ୍ୟାୟ ପାଇବା ପାଇଁ ଛାତ୍ରୀଙ୍କ ପରିବାର ଲୋକେ ପଟ୍ଟାମୁଣ୍ଡାଇ ଗ୍ରାମାଞ୍ଚଳ ଥାନାରେ ୮ ମାସ ତଳୁ ଅଭିଯୋଗ କରିଥିଲେ । ପୋଲିସ ବ୍ଲାକ ମେଲ କରୁଥିବା ପୁରୁଷ ବନ୍ଧୁଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କଲାନାହିଁ । ଓଲଟା ପୁରୁଷ ବନ୍ଧୁଙ୍କୁ ସୁରକ୍ଷା ଦେଲା । ବାରମ୍ବାର ଥାନାକୁ ଦୌଡ଼ି ଦୈାଡି ନ୍ୟାୟ ନ ପାଇବାରୁ ଛାତ୍ରୀ ଜଣକ ନିଜ ଦେହରେ କିରୋସିନ ଢାଳି ନିଜ ଘରେ ଆତ୍ମହତ୍ୟା କରିଛନ୍ତି । ଘଟଣା ଘଟିବା ପରେ କେନ୍ଦ୍ରାପଡ଼ା ଜିଲ୍ଲା ଆରକ୍ଷୀ ଅଧୀକ୍ଷକ ସିଦ୍ଧାର୍ଥ କଟ୍ଟାରିଆ, ଅତିରିକ୍ତ ଆରକ୍ଷୀ ଅଧୀକ୍ଷକ ସୁଧାକର ସାହୁ, ଏସଡିପିଓ କ୍ଷମା ସାଗର ପଣ୍ଡା, ପଟ୍ଟାମୁଣ୍ଡାଇ ଆଦର୍ଶ ଥାନା ଅଧିକାରୀ ବନ୍ଦନା ପାତ୍ର, ଗ୍ରାମାଞ୍ଚଳ ଥାନା ଅଧିକାରୀ ଧୀରଜ ଲେଙ୍କାଙ୍କ ସମେତ ସାଇଣ୍ଟିଫିକ ଟିମ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି । ଛାତ୍ରୀଙ୍କ ବାପା ଗଣମାଧ୍ୟମକୁ କହିଛନ୍ତି ଯେ ତାଙ୍କ ଝିଅ ଜଣେ ଯୁବକଙ୍କୁ ଭଲ ପାଉଥିଲେ । କିନ୍ତୁ ଉଭୟଙ୍କର ବିଚ୍ଛେଦ ହୋଇଥିଲା । ହେଲେ ଯୁବକ ଜଣକ ଝିଅର ଦୁର୍ବଳ ମୁହୂର୍ତ୍ତର ଫଟୋ ଓ ଭିଡିଓ ରଖି ବ୍ଲାକ ମେଲ କରୁଥିଲେ । କେତେକ ଫଟୋ ସାମାଜିକ ଗଣମାଧ୍ୟମରେ ଭାଇରାଲ କରିିଥିଲେ । ଆଉ କିଛି ଭିଡିଓ ଏବଂ ଫଟୋ ନିଜ ପାଖରେ ରଖି ଝିଅକୁ ସବୁ ବେଳେ ବ୍ଲାକ ମେଲ କରୁଥିଲେ । ଏ ନେଇ ଗତ ୮ ମାସ ହେବ ଗ୍ରାମାଞ୍ଚଳ ଥାନାକୁ ନ୍ୟାୟ ପାଇବା ପାଇଁ ଝିଅର ବାପା ଦୌଡୁ ଥିଲେ କିନ୍ତୁ ପୋଲିସ ନ୍ୟାୟ ଦେଲାନାହିଁ । ଅଭିଯୁକ୍ତକୁ ଓଲଟା ପୋଲିସ ସହଯୋଗ କରିଥିଲା । ଯାହା ଫଳରେ ଯୁବକ ଜଣକ ଗିରଫ ହେଉନଥିଲେ । ତେଣୁ ସେ ଝିଅକୁ ବାରମ୍ବାର ବ୍ଲାକ ମେଲ କରିଚାଲିଥିଲେ । ଗୋଟିଏ ପଟେ ପୁରୁଷ ବନ୍ଧୁଙ୍କ ବ୍ଲାକ ମେଲିଙ୍ଗ ଓ ଅନ୍ୟପଟେ ପୋଲିସର ଅସହଯୋଗର ଶିକାର ହୋଇ ଯୁବତୀ ଜଣକ ନିଜ ଦେହରେ ବୁଧବାର ସକାଳ ପ୍ରାୟ ୯ ଟାରେ କିରୋସିନ ଢାଳି ଆତ୍ମହତ୍ୟା କରିଛନ୍ତି । ତେବେ ପୋଲିସ ଯଦି ସଠିକ ସମୟରେ କାର୍ଯ୍ୟାନୁଷ୍ଠାନ ଗ୍ରହଣ କରିଥାନ୍ତା ତାହାହେଲେ ଝିଅ ଆତ୍ମହତ୍ୟା ପନ୍ଥା ଗ୍ରହଣ କରି ନଥାନ୍ତା ବୋଲି ଯୁବତୀଙ୍କ ବାପା କହିଛନ୍ତି ।
ଆରକ୍ଷୀ ଅଧୀକ୍ଷକ ସିଦ୍ଧାର୍ଥ କଟ୍ଟାରିଆ ଗଣମାଧ୍ୟମକୁ କହିଛନ୍ତି ଛାତ୍ରୀଙ୍କ ବାପାଙ୍କ ସହ କଥା ହୋଇଛି । ତାଙ୍କ କହିବା କଥା ସେ ଦୀର୍ଘ ଦିନ ହେବ ଥାନାକୁ ଦୈାଡି ନ୍ୟାୟ ପାଇନଥିଲେ । ସେ ନିଜେ ଏହାର ତଦନ୍ତ କରିବେ । ତଦନ୍ତର ଫଳାଫଳ ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରିବେ ବୋଲି ସେ କହିଛନ୍ତି । ଏହି ଘଟଣାକୁ ନେଇ ରାଜନୀତି ସରଗରମ ହୋଇଛି ବିରୋଧୀ ରାଜନଗର ବିଧାୟକ ଧ୍ରୁବ ସାହୁ କହିଛନ୍ତି ଡବଲ ଇଞ୍ଜିନ ସରକାରରେ ରାଜ୍ୟରେ ଆଇନ ଶୃଙ୍ଖଳା ପରିସ୍ଥିତି ନିୟନ୍ତ୍ରଣ ବାହାରକୁ ଚାଲି ଯାଇଛି । ପ୍ରଥମେ ବାଲେଶ୍ୱର ସୌମ୍ୟାଶ୍ରୀ ପରେ ପୁରୀ ଜିଲ୍ଲା ବଳଙ୍ଗା ଓ ଏବେ କେନ୍ଦ୍ରାପଡ଼ା ଜିଲ୍ଲାର ପଟ୍ଟାମୁଣ୍ଡାଇରେ ଜଣେ ଯୁବତୀ ଜଳି ଜୀବନ ଦେଇଛନ୍ତି । ରାଜ୍ୟରେ ପୋଲିସ ଉପରୁ ଲୋକଙ୍କ ଭରଷା ତୁଟି ଗଲାଣି । କାରଣ ପୋଲିସ ପାଖକୁ ନ୍ୟାୟ ପାଇବା ପାଇଁ ଲୋକେ ଗଲେ ନ୍ୟାୟ ପାଉନାହାନ୍ତି । ଯାହାର ଜ୍ୱଳନ୍ତ ଉଦାହରଣ ହେଉଛି ପଟ୍ଟାମୁଣ୍ଡାଇ ଯୁବତୀ ଜଳି ମୃତ୍ୟୁ ବରଣ କରିବା ଘଟଣା । ଯୁବତୀଙ୍କ ବାପା ୮ ମାସ ହେବ ଝିଅକୁ ନ୍ୟାୟ ଦେବା ପାଇଁ ପଟ୍ଟାମୁଣ୍ଡାଇ ଗ୍ରାମାଞ୍ଚଳ ଥାନାକୁ ଦୌଡୁ ଥିଲେ । ହେଲେ ଯୁବତୀ ନ୍ୟାୟ ପାଇଲେ ନାହିଁ । ଯାହା ଫଳରେ ସେ ପୋଲିସ ଉପରୁ ଆସ୍ଥା ହରାଇ ଆତ୍ମହତ୍ୟା ପନ୍ଥାକୁ ବାଛିନେଇଥିଲେ । ତେଣୁ ଗୃହ ବିଭାଗକୁ ନିଜ ପାଖରେ ରଖିଥିବାରୁ ନୈତିକତା ଦୃଷ୍ଟିରୁ ମୁଖ୍ୟମନ୍ତ୍ରୀ ଇସ୍ଥଫା ଦିଅନ୍ତୁ ବୋଲି ସେ କହିଛନ୍ତି । ସେହିପରି ରାଜ୍ୟରେ ଆଇନ ଶୃଙ୍ଖଳା ପରିସ୍ଥିତିକୁ ନିୟନ୍ତ୍ରଣରେ ରଖିବାରେ ବିଫଳ ହୋଇଥିବାରୁ ପୋଲିସ ମହା ନିର୍ଦେଶକ ମଧ୍ୟ ନିଜ ପଦ ଛାଡ଼ନ୍ତୁ ବୋଲି ଶ୍ରୀ ସାହୁ କହିଛନ୍ତି । ଏହି ଘଟଣାକୁ ନେଇ ବଡ଼ପଡା ଗ୍ରାମରେ ଶୋକର ଛାୟା ଖେଳି ଯାଇଛି । ମୃତୁ୍ୟ ଖବରପାଇ ହଜାର ହଜାର ଲୋକ ଭିଡ ଜମାଇଥିଲେ । ଏଥି ମଧ୍ୟରେ କେନ୍ଦ୍ରାପଡା ବିଜେଡି ଜିଲ୍ଲା ସଭାପତି ଶିବ ପ୍ରସାଦ ଭଳ, ରାଜନଗର ବିଧାୟକ ଧ୍ରୁବ ସାହୁ, ପୂର୍ବତନ ବିଧାୟକ ଅଂଶୁମାନ ମହାନ୍ତି, କିଶୋର ଚନ୍ଦ୍ର ତରାଇ, ଅଲଖ ଜେନା, ପଟ୍ଟାମୁଣ୍ଡାଇ ପୌରପାଳ ହେମନ୍ତ କୁମାର ସାହୁ ପ୍ରମୁଖ ମୃତ ପରିବାରକୁ ଭେଟି ସମ୍ବେଦନା ଜଣାଇଥିଲେ । ଏହି ଘଟଣା ସମଗ୍ର କେନ୍ଦ୍ରାପଡା ଜିଲ୍ଲା ଓ ପଟ୍ଟାମୁଣ୍ଡାଇ ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି କରିଛି ।
କେନ୍ଦ୍ରାପଡ଼ା ରୁ ଲକ୍ଷ୍ମୀ କାନ୍ତ ନାୟକ
